Flamuri i Maqedonisë së Veriut do të qëndrojë për 7 ditë radhazi në gjysmështizë për tragjedinë në klubin e natës në qytezën e Koçanit, që la pas 59 viktima dhe 155 të tjerë ndodhen në spital me plagë të rënda. Ministri i Brendshëm maqedonas, Pançe Toshkovski, tha se janë mbi 20 persona të dyshuar për zjarrin në diskotekë, ku deri më tani 15 janë arrestuar, mes të cilëve edhe zyrtarë e ish-zyrtarë të lartë. Mes të arrestuarve janë ish-sekretari i Ministrisë së Ekonomisë, një drejtues sektori në të njëjtën ministri, ish-drejtori i Drejtorisë për Mbrojtje dhe Shpëtim dhe tre punonjës të kësaj drejtorie. Gjithashtu, në pranga kanë rënë edhe disa organizatorë të ngjarjes në klubin e natës. Sipas ministrit të Brendshëm maqedonas, klubi i natës ku ndodhi tragjedia nuk kishte licencë për të ushtruar aktivitetin.