Presidenti Vladimir Putin ka akuzuar Ukrainën për nisjen e “një provokimi tjetër të madh”, pasi zyrtarët e mbrojtjes thanë se rreth 300 trupa ukrainase kaluan në rajonin Kursk të Rusisë. Luftimet thuhet se po vazhdojnë në zonë, pasi Moska tha se trupat e mbështetur nga 11 tanke dhe më shumë se 20 automjete të blinduara luftarake, kaluan kufirin, 10 km nga vija e frontit. Mijëra njerëz kanë lënë shtëpitë e tyre në rajon, thanë zyrtarët, teksa Ukraina ende nuk ka komentuar mbi akuzat ruse. Duke folur përpara një takimi të Këshillit të Sigurimit në Moskë, Putin akuzoi forcat ukrainase se “qëlluan pa dallim” ndaj ndërtesave dhe rezidencave civile. Luftimet thuhet se u zhvilluan në fshatra të ndryshëm në territorin rus gjatë të martës. Ajo u pasua nga sulmet ajrore ukrainase që vranë tre civilë dhe vazhduan gjatë natës, thanë autoritetet ruse. Njëzet e katër persona, përfshirë gjashtë fëmijë, janë plagosur në granatimet e Ukrainës në rajonin kufitar, tha Moska. Të mërkurën, Ministria e Mbrojtjes e Rusisë pretendoi se pengoi Forcat e Armatosura të Ukrainës që të përparonin “thellë në territorin rus” në rajonin e Kursk dhe tha se kishte shkatërruar disa dronë ukrainas gjatë natës. Megjithatë, një numër alarmesh ajrore vazhduan të lëshoheshin në Kursk, ku autoritetet lokale u kërkuan banorëve të kufizonin lëvizjet e tyre dhe të gjitha ngjarjet publike u anuluan.