Vangjel Tavo u është përgjigjur akuzave të kandidatit të opozitës pasi fitoi thellë zgjedhjet në Himarë dhe ka zbuluar telefonatën që mori nga Petro Gjikuria. Kryetari i ri i Himarës në një reagim në rrjetet sociale, shkruan se priste edhe që kundërshtari të pranonte ftesën publike që ai i bëri për të marrë postin e zëvendëskryetarit. “Himara kishte një arsye të madhe për t’u gëzuar sepse ishte ajo fituesja e 4 gushtit. Por, një shkëndijë më shumë e këtij gëzimi ishte edhe telefonata juaj e urimit e para pak orëve. E vlerësova shumë dhe e pranova sinqerisht. Por, pritshmëria ime e lartë ndaj teje zgjati vetëm pak e tani jam i keqardhur për reagimin tënd, a thua se Himara është një fushë betejash ku përballen ushtri armike dhe jo alternativa politike dhe qytetare, si në të gjithë Shqipërinë demokratike”, shkruan Tavo ndër të tjera. Socialisti fitoi bashkinë e Himarës në zgjedhjet e pjesshme të 4 gushtit, me rreth 1500 vota më shumë se Gjikuria. Pjesëmarrja në zgjedhjet e pjesshme te Himarës rezultoi 37.69 %, me 8678 votues që shprehen vullnetin e tyre me votë nga 23.074 persona që ishin thirrur për të marrë pjesë në zgjedhje. Në krahasim me zgjedhjet vendore të 14 majit 2023 rezultuan mbi 800 votues më shumë.