Talibanët kanë mbajtur sot për herë të parë takime kokë më kokë me të dërguarit e BE-SHBA në Doha, teksa islamistët vijojnë përpjekjet diplomatike për njohje. Liderët e rinj të Afganistanit kërkojnë mbështetje për të evituar një krizë humanitae në vend, qe prej largimit të SHBA nga vendi pas 20 vjet lufte. Kreu i OKB, Antonio Guterres ka bërë thirrje për donacione për Afganistanin, edhe pse ka kritikuar premtimet e pambajtura të tyre për të drejtat e grave e vajzave. Bisedimet direkte në Doha u ndërmjetësuan nga Katari, vend i cili ka pasur prej kohësh një përfaqësi të tyre. Zëdhënësja e BE, Nabila Massrali tha se takimi i lejon dy palëve trajtimin e çështjeve si qarkullimi i njerëzve, kalimi i ndihmës humanitare apo respektimi i të drejtave të grave. Regjimi ende nuk është njohur nga vendet e tjera dhe përballet me sfida sigurie prej sulmeve të Shtetit Islamik. "Ne duam një marrëdhënie pozitive me të gjithë botën," tha ministri talibani jashtëm Amir Khan Muttaqi në një prej eventeve. Para takimit kreu i diplomacisë së BE, Josep Borrell tha se do të jepet ndihmë direkte që vendi të shmangë falimentimin.