Lufta në Lindjen e Mesme hyri të shtunën në javën e tretë, me një përshkallëzim sulmesh të SHBA dhe Izraelit ndaj Iranit, ku u sulmua centrali iranian i pasurimit bërthamor. Autoritetet në Teheran raportuan se “nuk ka rrjedhje të materialeve radioaktive apo rrezik për banorët aty pranë”. Ushtria amerikane njoftoi se ka goditur mbi 8 mijë objektiva ushtarake iraniane, dhe se aftësia e Teheranit për të kërcënuar ngushticën e Hormuzit tashmë është “degraduar”. “Marina e tyre nuk po lundron, ata kanë humbur aftësinë për të lëshuar raketa dhe dronë me shpejtësinë e lartë, që kishin në fillim të konfliktit. Aftësia e Iranit për të kërcënuar lirinë e lundrimit në dhe përreth Ngushticës së Hormuzit është degraduar si rezultat, dhe ne nuk do të ndalemi së ndjekuri këto objektiva”, njoftoi admirali Brad Cooper, komandant i Komandës Qendrore të SHBA-së, duke shtuar se “mbi 8000 objektiva ushtarake iraniane janë goditur nga SHBA-të, përfshirë 130 anije iraniane”. Vetë presidenti amerikan, Donald Trump, dha shenja lodhjeje nga aksioni ushtarak në Teheran, duke paralajmëruar për fundin e luftës.