Dy anije mallrash ranë pre e një sulmi me raketa dhe dronë në Detin e Kuq. Shtetet e bashkuara thanë të premten se raketat dhe droni u lëshuan nga pjesa e territori të Jemenit që kontrollohet nga lëvizja rebele, Huthi. Lëvizje kjo rebele që mbështetet nga Irani. Anijet, njëra prej të cilave me flamur të Liberisë dhe në pronësi të një kompanie gjermane, sipas BBC u goditën në ngushticën e vogël të ujit Bab El Mandab. Zonë kjo që është jetike për tregtinë globale. Edhe më herët anijet tregtare në këtë zonë detare kanë rënë pre e sulmeve nga ana e këtij grupi. Por sulmet ndaj anijeve janë rritur më së shumti, pas nisjes së luftës mes Izraelit dhe grupit të Hamas. “Ne jemi të vetëdijshëm se diçka që u lëshua nga një rajon i Jemenit i kontrolluar nga Huthi, e goditi një anije që u dëmtua, dhe u raportua për një zjarr”, tha një zyrtar amerikan për agjencinë e lajmeve AFP të premten. Huthi, ashtu si grupi islamik I Hezbollah, është rreshtuar në krah të mbështetësve të Hamas. Ai thotë se po sulmon çdo anije që udhëton drejt Izraelit. Ky grup, I cili ka mbështetjen e Iranit, erdhi në pushtet para nëntë viteve dhe prej asaj kohe është kthyer në një nga makthet më të këqija të anijeve të mallrave të cilat janë bërë objekt sulmesh. Nga shpërthimet nuk pati persona të lënduar në ekuipazh. Pamjet: AFP