20 vjecari shqiptar Kujtim F., autori i sulmit terroriste me katër të vdekur në Vjenë 2 nëntorin e vitit të kaluar, kishte bashkëpunëtorë në Gjermani. Edhe ata janë më origjinë shqiptare. Në vazhdën e hetimeve kundër kësaj ngjarjeje të rëndë dhe terrorit në përgjithësi, Prokuroria e Përgjithshme kontrolloi sërish apartamentet e dy islamistëve nga Osnabryku dhe Kaseli që me gjasë kanë pasur dijeni për atentatin në Vjenë. Pak para atentatit në kryeqytetin austriak, dy islamistët në Gjermani kishin filluar ta fshihnin komunikimin me atentatorin e ardhshëm. Mediat gjermane bëjnë të ditur, se këta persona, Drilon G. me nënshtetësi gjermane, dhe Blinor S. kosovar, janë të dyshuar, jo vetëm se ishin miq të terroristit islamist, por sepse me gjasë kanë pasur dijeni mbi atentatin. Akuza kundër tyre është pikërisht se kanë pasur informacion që Kujtim F. po planifikonte një atentat dhe nuk e kanë denoncuar atë, por e kanë "pranuar me vetëdije". Sipas Prokurorisë së Përgjithshme gjermane që të dy këta persona kanë "një botëkuptim radikal-islamik dhe për një kohë të gjatë para atentatit kanë qenë në kontakt me Kujtim F. përmes mediave sociale." Më vonë ata janë përpjekur të fshehin lidhjen që kanë pasur. Të dy personat kanë qenë në fokus të autoriteteve gjermane për zbardhjen e të dhënave mbi rrjet të dyshuar terroristësh, që shtrihet nga Gjermani, Zvicër, Austri dhe disa shtete të Ballkanit. "Luanët e Ballkanit" quhej rrjeti terrorist, tek i cili ka qenë pjesë edhe atentatori islamist i Vjenës.