Dhjetë persona, mes tyre 2 arkitektë janë marrë të pandehur nga Prokuroria e Tiranës pasi akuzohen se kanë ndërtuar shtatë vila në zonën e Mulletit me dokumente të falsifikuara. Burime të Top Channel bëjnë me dije se të pandehur janë marrë shtetasit, Armand Prelezi, Klevis Bregu, Manush Teqja, Florian Zela, Abaz Teqja, Tefta Visha, Dorina Dushku, Arblin Harizi dhe Gani Moka. Sipas prokurorisë, Armand Prelezi dhe Klevis Bregu, të dy arkitektë, akuzohen për veprën penale “Falsifikim i dokumentave”, ndërsa 8 shtetasit e tjerë, për veprën penale “Ndërtim i paligjshëm”. Prokuroria thotë e ka prova që në zonen e Mulletit janë ndërtuar 7 vila formalisht të pajisura me leje rindërtimi, por që ka rezultuar se dokumetacioni tekniko ligjor i përdorur pasqyronte të dhëna të rreme, duke cenuar fondin pyjor, në juridiksion të Bashkisë Tiranë. Prokuroria tha se nga verifikimi i thjeshtë i koordinatave nëpërmjet aplikacionit ‘Google Maps’, del se të dhënat e pasqyruara në relacione nga Arkitektët Armando Prelezi dhe Klevis Bregu, tregojnë vendndodhje të ndryshme krahasuar me vendndodhjen reale të objekteve të konstatuara nga vetëdeklarimet e bëra pranë Agjencisë Shtetërore të Kadastrës. Gjykata e Shkallës së Parë e Juridikisonit të Përgjithshëm Tiranë ka vendosur sekuestro preventive mbi shtatë vilat, ndërsa hetimet vijojnë në drejtim të veprimeve dhe mosverimeve të enteve publike si dhe bashkepunëtorëve të mundshëm të dhjetë të pandehurve.