Shqipëria del pas 29 vjetësh nga lista e vendeve në monitorim nga Këshilli i Evropës për çështjet e të drejtave të njeriut. Në Strasburg është vlerësuar puna e SPAK për ndëshkimin e korrupsionit të nivelit të lartë. Ndërkaq, Këshilli u kërkon palëve politike në Shqipëri që të shohin me prioritet disa çështje, mes tyre edhe votimin e diasporës. Ministri i Jashtëm, Igli Hasani falënderoi Asamblenë Parlamentare të KiE për njohjen e reformave transformuese të drejtësisë në Shqipëri dhe theksoi se po shihen rezultatet e shumëpritura të angazhimit të Shqipërisë ndaj standardeve europiane. “Faleminderit Asamblesë Parlamentare të Këshillit të Evropës dhe raportuesit Ionut Stroe, për njohjen e reformave transformuese të drejtësisë në Shqipëri, luftën tonë kundër korrupsionit dhe përparimin e Shqipërisë në të drejtat e njeriut dhe demokracinë. Angazhimi i Shqipërisë ndaj standardeve të Këshillit të Evropës, ka qenë i palëkundur dhe përpjekjet tona të pandërprera më në fund po japin rezultatet e shumëpritura”, – shkruan Hasani.