Drejtori i Policisë Rrugore, Altin Qato, është pezulluar nga detyra, pasi ditën e premte qëlloi me shuplakë një të ri në Thumanë. Vendimin për pezullimin e tij e mori Drejtori i Përgjithshëm i Policisë së Shtetit, Muhamet Rrumbullaku. Altin Qato, me gradën drejtues i parë në policinë e shtetit, u filmua teksa gjuante me shuplakë në Thumanë një të ri që del nga makina. Menjëherë pasi video ku drejtori i policisw godet qytetarin u bë virale në rrjetet sociale, Rrumbullaku vendosi të pezullonte nga detyra përkohësisht drejtorin e Rrugores, Altin Qato. Gjithashtu, ndaj tij ka filluar hetimi për shkelje të rëndë disiplinore që do të kryhet në bashkëpunim me Agjencinë e Mbikëqyrjes Policore. Sipas Policisë së Shtetit, qytetarët që shfaqen në video nuk ishin pjesë e protestës që po zhvillohej nga banorët e zonës në aksin rrugor Thumanë -Kashar, por udhëtonin me mjetin e tyre në drejtim të Tiranës, duke kryer manovra në rrugë dhe kundërshtuar e ofenduar punonjësit të Policisë Rrugore, të cilët i kanë këshilluar për të ulur shpejtësinë dhe për të qëndruar në radhë deri sa të normalizohej lëvizja. Policia sqaron se, edhe pas këshillimit nga ana e punonjësve të Policisë Rrugore, këta shtetas kanë vijuar t’i bien pa pushim borisë së automjetit, duke shkaktuar shqetësim te përdoruesit e tjerë të rrugës dhe njëherazi irritim të tyre.