Një person është arrestuar këtë të mërkurë në Tiranë pas një aksioni policor që nisi në zonën e “Myslym Shyrit” dhe përfundoi pranë shkollës Petro Nini Luarasi”. Fillimisht policia ka ndjekur një automjet në rrugën “Myslym Shyri” pasi dyshohej se kishte armë zjarri. Gjatë ndjekjes ai ka përplasur disa mjete të parkuara rrugës, ndërsa nuk raportohet për të lënduar. Gazetarja e Top Channel, Dorjana Bezat, raporton se nuk ka pasur të shtëna me armë, ndërsa shoferi që drejtonte makinën është arrestuar. Një armë zjarri është gjetur në makinë gjatë kontrollit. Mësohet se i arrestuari, identiteti i të cilit nuk dihet ende ka lidhje me Aleksandër Sadikajn, i vrarë në autostradën Tiranë-Elbasan në 11 qershor 2022. 27-vjeçari nga Berati u ekzekutua nga shpërthimi i një bombe të vendosur në makinën me të cilën po lëvizte. Viktima ishte skeduar për një sërë veprash penale si vjedhje, vrasje, plagosje dhe mosbindje e kundërshtim të forcave të policisë dhe hetimet për vrasjen e saj janë fokusuar në të shkuarën e tij. Disa ditë më parë një tjetër shok i Sadikajt është zhdukur pa gjurmë. Ai është denoncuar i humbur nga familjarët më 25 qershor. “Më datë 24.06.2025, në Stacionin e Policisë Memaliaj ka kallëzuar shtetasi S. M., 73 vjeç, banues në fshatin Bylysh, se djali i tij, shtetasi E. M., 30 vjeç, është larguar nga banesa, më datë 15.06.2025. Punohet për gjetjen e tij. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme”, sipas policisë.