Sulmet ajrore izraelite vazhduan të binin si shi në territorin e rrethuar palestinez ndërsa forcat tokësore izraelite vijuan betejat vdekjeprurëse me militantët e Hamasit, brenda Gazës. Kryeministri izraelit Benjamin Netanyahu tha se Izraeli nuk do t'i "dorëzohet Hamasit", duke argumentuar se "thirrjet për armëpushim" janë të barabarta me "dorëzimin ndaj terrorizmit", në një konferencë për shtypin ndërkombëtar nga Tel Avivi. Sipas Netanjahut të gjithë ata që bëjnë thirrje për armëpushim duhet të "kërkojë lirimin e pengjeve izraelite menjëherë dhe pa kushte". Nga ana tjetër, agjencia e Kombeve të Bashkuara raportoi "kushte gjithnjë e më të dëshpëruara" në Rripin e Gazës. Aftësia e tyre për të ofruar ndihmë u pengua nga ndërprerja 36-orëshe e komunikimit që preku të gjithë Rripin, duke përfshirë organizatat humanitare" tha një deklaratë agjencia e OKB-së. Organizata bën me dije se ajo pret "pothuajse 672 mijë persona të zhvendosur brenda vendit" në 149 strehimore të saj. “Megjithatë, strehimoret nuk kanë më kapacitet apo hapësirë për të akomoduar të zhvendosurit rishtas, duke detyruar shumë njerëz të flenë në rrugë.” Ministria e Shëndetësisë në Gazë, që udhëhiqet nga grupi militant palestinez, Hamas, tha se gjatë ditës së kaluar janë vrarë 304 persona, duke bërë që numri i përgjithshëm i viktimave që nga nisja e luftës me Izraelin të arrijë në 8.306 viktima. Në mesin e të vrarëve janë 3.457 fëmijë dhe 2.136 gra, duke shtuar se afër 1.950 persona vazhdojnë të jenë të bllokuar nën rrënoja të ndërtesave. Pamjet: AFP