Presidenti Joe Biden përgatitet të firmosë javën që vjen urdhrin ekzekutiv për emigracionin që synon forcimin e kontrollit në kufirin SHBA-Meksikë. Përmes këtij urdhri mund të ndalohet shqyrtimi i kërkesave për azil dhe të ndalohet hyrja e emigrantëve pas arritjes së një kuote të caktuar ditore. Vetëm pak muaj përpara zgjedhjeve presidenciale ku Joe Biden do të kërkojë një tjetër mandat në krye të Shtëpisë së Bardhë, demokrati ka ashpërsuar qasjen në lidhje me sigurinë kufitare gjatë muajve të fundit. Anketime të ndryshme kanë treguar se emigracioni mbetet një shqetësim kryesor për votuesit amerikanë. Republikanët, duke përfshirë kundërshtarin e tij, ish-presidentin Donald Trump, e kanë kritikuar Biden se është tërhequr nga politikat kufizuese për emigracionin të vendosura gjatë administratës Trump dhe se ka dështuar të frenojnë numrin e lartë të emigrantëve të paligjshëm që kalojnë kufirin. Sipas disa burimeve megjithatë, Biden nuk e ka dhënë ende miratimin përfundimtar për planin, ndërsa një njoftim mbi hapat që ai mund të ndërmarrë, pritet ditën e martë.