Në sitën e qeverisë amerikane për të huajt tanimë do të kalojnë më me kujdes edhe gazetarët. Administrata Trump planifikon të ashpërsojë akoma edhe më tej rregulloren për lejen e qendrimit për të huajt, dhe reporterët do të jenë në fokusin e vecantë të Ministrisë për Mbrojtjen e Atdheut së bshku me studentët dhe shkencëtarët. Kështu, gazetarëve të huaj në SHBA këtej e tutje do t'u duhet ta zgjasin çdo tetë muaj afatin e lejes së qendrimit. Për procedurën e zgjatjes së afatit duhet të aplikohet në Autoritetin e Emigracionit në SHBA, USCIS, gjë që nënkupton verifikime më të hollësishme. Deri tani për gazetarët e huaj leja e qendrimit lëshohej deri në pesë vjet. Në të ardhmen vizat për studiues do të jepen maksimumi deri në katër vjet, sic e tregon një publikim në fletoren zyrtare të SHBA-së. Deri tani studiuesve u jepej vizë me kohëzgjatje në varësi të programit përkatës akademik, që në rast të studimeve për doktoraturë viza mund të jepej edhe për pesë vjet. Rregullorja e re argumentohet me faktin, se qeveritë e mëparshme kanë lejuar, që të huajt "si studentë të përhershëm" siguronin qendrim pa afat në SHBA, deklaron Ministria e Mbrojtjes së Atdheut. "Kjo bart probleme sigurie dhe u kushton dollarë pafund taksapaguesve dhe u krijon disavantazhe shtetasve të SHBA-së”, nënvizohet në sqarimin e saj. Ministria nuk dha të dhëna, se cilat disavantazhe u krijohen taksapaguesve në SHBA prej studiuesve nga jashtë. Studiuesit normalisht paguajnë tarifat e studimit duke qenë një burim i rëndësishëm të ardhurash për universitetet. Në vitin akademik 2023/24 kanë studiuar në SHBA rreth 1,1 milionë të huaj nga jashtë vendit, më shumë se në çdo vend tjetër të botës. Qeveria e SHBA-së gjatë muajve të fundit, sipas të dhënave të veta, u ka anuluar rreth 6000 viza studentësh.