Komanda Qendrore e Shteteve të Bashkuara bëri të ditur se forcat amerikane kanë goditur një anije cisternë nafte me flamur iranian në Gjirin e Omanit, në një zhvillim që shton më tej tensionet në rajon. Sipas njoftimit të publikuar në rrjetet sociale, anija “M/T Hasna” po tentonte të lundronte drejt një porti iranian, veprim që sipas SHBA-së shkel bllokadën në fuqi ndaj porteve të Iranit. CENTCOM thekson se pas disa paralajmërimeve, forcat amerikane qëlluan mjetin lundrues me artileri, duke e nxjerrë jashtë funksionit. “Bllokada amerikane ndaj anijeve që hyjnë dhe dalin nga portet iraniane mbetet në fuqi të plotë”, thuhet në deklaratën e komandës amerikane. Ndërkohë, situata në Lindjen e Mesme është përshkallëzuar edhe në frontin libanez. Mbrëmjen e së mërkurës, Izraeli ka kryer një sulm të shënjestruar ndaj një komandanti të lartë të Hezbollahut. Kryeministri izraelit Benjamin Netanyahu konfirmoi se objektivi i sulmit ishte një nga drejtuesit kryesorë të kësaj njësie, e cila sipas tij ka qenë e përfshirë në sulme ndaj komuniteteve dhe forcave izraelite. Megjithatë, ai nuk dha detaje nëse komandanti i shënjestruar është vrarë. Sipas burimeve të cituara nga CNN, operacioni është koordinuar paraprakisht me Shtetet e Bashkuara.