Presidenti i Serbisë, Aleksandar Vuçiç, i ka propozuar Kuvendit kandidatin për kryeministër. Ai është Millosh Vuçeviç 50 vjeç dhe aktualisht mban postin e zëvendëskryeministrit dhe ministrit të Mbrojtjes, njëherësh është udhëheqës i Partisë Progresive Serbe. Vendimin e ndau vetë Vuçiç përmes një postimi në Instagram, ku thotë se Millosh Vuçeviç deri më tani ka kryer me përgjegjësi detyrat e ngarkuara duke treguar se ka dedikim dhe ekspertizën e nevojshme për të kryer funksionin e kryeministrit.Vuçeviç do të zëvendësojë kryetaren e mëparshme të qeverisë, Ana Brnabiç. Avokati 49-vjeçar është zëvendëskryeministër dhe ministër i Mbrojtjes që nga viti 2022. Në maj 2023, ai u zgjodh gjithashtu kryetar i SNS, duke zëvendësuar Vuçiçin në krye të partisë. Afati për formimin e Qeverisë së Serbisë është 90 ditë nga data e konstituimit të Kuvendit. Nëse parlamenti brenda kësaj periudhe nuk e zgjedh qeverinë ose nuk e zgjedh qeverinë e re brenda 30 ditëve nga dita e mbarimit të mandatit të qeverisë së mëparshme, presidenti është i detyruar të shpërndajë Kuvendin Kombëtar. Kjo mbledhje e Kuvendit të Serbisë është konstituar më 6 shkurt, me verifikimin e mandatit të deputetëve të rinj, kështu që 6 maji është afati i fundit për zgjedhjen e Qeverisë së re të Serbisë. Në zgjedhjet e parakohshme parlamentare të 17 dhjetorit 2023, SNS mori rreth 47% të votave.Aleanca liberale e opozitës ”Serbia kundër dhunës” (SPN) doli e dyta me rreth 23% të votave. Zgjedhjet u shoqëruan me akuza për mashtrim nga opozita, ndërkohë që edhe OSBE në raportin final po ashtu u tha se ka pasur presion ndaj punëtorëve të sektorit publik për të votuar për Qeverinë dhe keqpërdorim të burimeve publike në favor të pushtetit. Më 8 shkurt, Parlamenti Evropian miratoi një rezolutë që kërkonte hetim ndërkombëtar për parregullsitë e raportuara për zgjedhjet e dhjetorit të mbajtura në Serbi Pamjet: AFP