Top Channel/Sekuestrohet vila në Petrelë/Prokuroria: Pa leje ndërtimi e me dokumente të falsifikuara

Me urdhër të prokurorisë së Tiranës është sekuestruar një vilë në Petrelë, duke e cuar në 8 numri i vilave të sekuestruara në periferi te kryeqytetit por që rezultojnë me dokumente të falsifikuara. Vila e sekuestruar në Petrele ka një sipërfaqe toke rreth saj 660 m2 në Kërrabë, Petrelë, pjesë e parcelës ku Prokuroria sekuestroi edhe 7 ndërtesa në formë vilash me strukturë betoni me sipërfaqe të ndryshme dhe me mbulesa të llojit çati dhe tarracë betoni rreth një muaj më parë pasi edhe ato ishin ndërtuar me dokumente të falsifikuara, ndërsa u morën të pandehur 10 persona. Hetimet paraprake të prokurorisë kanë nisur vitin e kaluar për veprën penale të “Ndërtimi të paligjshëm". Sipas prokurorisë ndërtimet ishin formalisht të pajisura me leje rindërtimi, por që dokumentacioni tekniko-ligjor rezultoi me të dhëna të rreme. Prokuroria bën me dije se përveç ndërtimit te paligjshëm jemi përballe edhe falsifikimit të dokumenteve pasi rezulton te jetë falsifikuar edhe një akt ekspertizë e Institutit të Ndërtimit.