Gjykata e Sarandës ka dënuar me 2 vite burg biznesmenin 68 vjeçar Pando Papuçi, i akuzuar për “ndërtim të paligjshëm” dhe ka vendosur konfiskimin dhe kalimin në favor të shtetit të pallatit shtatë katësh në ndërtim e sipër që ndodhet në hyrje të qytetit bregdetar. Hetimet ndaj biznesmenit sarandiot për “ndërtim të paligjshëm” dhe tre ish-zyrtarëve në Sarandë për akuzën e “shpërdorimit të detyrës” nisën që në vitin 2021, por dosja në ngarkim të Papuçiut është ndarë nga tre të tjerët dhe është gjykuar më vete me gjykim të shkurtuar, ndërkohë që për të tjerët, ish zyrtarë, vazhdon ende. Ndërkohë që prokuroria kërkoi 5 vite burg, Gjykata e ka dënuar biznesmenin me 3 vite, për “ndërtim të paligjshëm”, por duke qenë se përfitoi nga gjykimi i shkurtuar, 68-vjeçari do të vuajë vetëm 2 vite burg. Përvec kësaj, gjykata ka vendosur konfiskimin dhe kalimin në favor të shtetit të pallatit 7 katësh dhe dënimin e shoqërisë “2P-SJ” me “mbarimin e personit juridik”. Pando Papuçi ishte shpallur në kërkim prej 21 shkurtit 2022 në kuadër të operacionit “Heshtja” për veprën penale “ndërtim i paligjshëm”, lidhur me një pallat 7 katësh në hyrje të qytetit të Sarandës, por u vetëdorëzua në 9 shkurt 2024 e më pas Gjykata e la atë në masën “detyrim paraqitje”.