Rusia i ndaloi hyrjen në territorin e saj kryeministrit Boris Johnson, sekretares së Jashtme, Liz Truss, dhe disa ministrave të tjerë britanikë, pasi Londra mori masa që synojnë izolimin e Moskës pas agresionit të saj ndaj Ukrainës. Ministria e Jashtme ruse pohoi se këto masa, të aprovuara në koordinim me Shtetet e Bashkuara, Bashkimin Evropian dhe aleatët e tjerë, po “godasin” ekonominë e brendshme. Në listën e zezë të Rusisë është përfshirë edhe ish shefja e ekzekutivit britanik, Theresa May e madje Moska thotë se nuk do të ndalet këtu, por në “një të ardhme të afërt” lista do të zgjerohet edhe më shumë. Ndërkohë, sanksione të shumta perëndimore janë vendosur ndaj zyrtarëve rusë, përfshirë edhe vetë Vladimir Putin dhe familjen e tij, por edhe ndaj kompanive dhe oligarkëve rusë që shihen si të afërt me udhëheqjen e shtetit. Britania nga ana e saj përcolli krejt tjetër shqetësim. Ajo u përqëndrua tek fakti që sulmet ruse ndaj infrastrukturës civile në Ukrainë po pengojnë shpërndarjen e ndihmës humanitare për civilët në zonat ku trupat ruse janë tërhequr. “Infrastruktura rrugore në konflikt, në zonat e prekura të Ukrainës, ka pësuar dëme të mëdha”, thuhet në një postim të ministrisë britanike të mbrojtjes në Tëitter. “Trupat ruse e kanë përkeqësuar situatën duke shkatërruar ura, duke vendosur mina tokësore dhe duke braktisur veturat ushtarake përgjatë rrugëve kyçe, teksa janë tërhequr nga veriu i Ukrainës”, theksohet aty” e kjo bën që të vështirësohet së tepërmi dërgimin e ndihmave”. Moska është tërhequr nga zonat veriore të vendit fqinj, duke thënë se do ta përqëndrojë vëmendjen e saj në rajonet lindore.