Një avion “Candair” është rrëzuar në zonën Karisto gjatë kohës që po shuante flakët, në vatrën e rindezur gjatë ditës së sotme. Avioni zjarrfikës ka rënë në mes të zjarrit, e më pas ka shpërthyer duke i marrë jetën dy pilotëve, sipas medias greke ERT Neës që zbuloi momentin e rrëzimit, ndëkohë raportojnë se numri i viktimave dyshohet se është më i lartë. Ndërkohë gjendja vijon të mbetet alarmante në Rodos dhe Korfuz të Greqisë, ku prej ditësh flakët po shkrumbojnë jo vetëm zona me bimësi por edhe ndërtesa të shumta. Ekipet e zjarrfikësve vijojnë punën intensive për të shuar flakët, por ende nuk kanë arritur t’i marrin nën kontroll. Kryeministri i vendit Kyriakos Mitsotakis deklaroi se vendi është në gjendje lufte, ndërsa të gjithë personat e prekur do të dëmshpërblehen. Në Rodos po operojnë qindra grupe zjarrfikësish dhe vullnetarësh, që janë në luftë me kohën. Moti me erëra të forta dhe temperature të larta ka vështirësuar akoma më shumë situatën, e cila mbetet e rëndë. Gjendje e alarmit është shpallur ditën e sotme për Kretën, ndërsa ende vijojnë evakuimet. Një ditë më parë më shumë se 30 mijën turistë braktisën Rodosin në një kohë rekord, ndërsa aeroporti po strehon të tjerë që pritet të largohen nga Greqia. Gjatë orëve të fundit Korfuzi pati një rindezje të vatrave të zjarrit, ndërsa banorët janë njoftuar për tu larguar menjëherë. Sipas autoriteteve vendase pritet që pas së enjtes situata të përmirësohet, kjo falë uljes së temperaturave. Pamjet: AFP