7 të mbijetuar u kthyen të enjten në Azerbajxhan derisa vendi po mban ditë zie 24 orë pas rrëzimit të aeroplanit të Azerbaijan Airlines në Kazakistan, ku humbën jetën 38 njerëz. Thuhet se avioni u rrëzua derisa po fluturonte sipas orarit nga kryeqyteti i Azerbajxhanit, Baku, drejt Groznit në rajonin rus të Çeçenisë me 67 njerëz në bord, pasi e kishte devijuar rrugën dhe kishte tentuar të bënte ulje emergjente afër qytetit Aqtau në perëndim të Kazakistanit. Disa ekspertë përmendën vrimat e dukshme në pjesën e bishtit të avionit si shenjë të mundshme se mund të jetë goditur nga sistemet ruse të mbrojtjes ajrore, të angazhuara në parandalimin e sulmeve me dronë nga Ukraina. Autoritetet azerbajxhanase dhe kazake kanë nisur një hetim për ta zbuluar shkakun e aksidentit. Zyrtarët thanë se regjistruesi i kabinës së avionit është gjetur dhe bënë thirrje për kujdes në lidhje hedhjen e fajësisë para se faktet të përcaktohen. Zyrtarët në Baku deklaruan se të lënduarit mbërritën me një fluturim special të organizuar nga Ministria e Çështjeve Emergjente e Azerbajxhanit dhe se ata u shoqëruan nga mjekë profesionistë. Gjendja e të lënduarve, të cilët ishin ndër 29 të mbijetuarit nga rrëzimi i avionit, nuk dihet ende. Presidenti i Azerbajxhanit, i cili ndërpreu vizitën e tij për një samit informal në Rusi, tha se është ende herët për ta përcaktuar shkakun, por shtoi se moti i keq mund të ketë kontribuar në rrëzimin e avionit.