Sekretari për Decentralizimin dhe Pushtetin Vendor në PD, Roland Bejko të shtunën ka deklaruar se ka filluar rishikimi i Reformës Administrativo-Territoriale dhe sipas tij demokratët kanë filluar konsultimet me ekspertët më të mirë të fushës për ta sjellë pushtetin vendor në shërbim të qytetarëve. Në një deklaratë për mediat, Bejko tha se Pavarësisht se Reforma Administrative-Territoriale ishte e domosdoshme, ajo nuk ka reflektuar plotësisht parimet e Kartës Europiane të Autonomisë Vendore. Sipas tij, kjo reformë në zanafillën e vet synoi thellimin e decentralizimit, por koha tregoi se e thelloi edhe më shumë centralizimin, duke rritur varësinë dhe kontrollin e pushtetit vendor nga qeveria qëndrore. Ai theksoi se reforma synoi edhe subsidaritetin, por e largoi edhe më shumë qytetarin nga pushteti dhe vendimmarrja.