Ambasada britanike në Tiranë ka shprehur shqetësim lidhur me zhvillimet e fundit në parlamentin e Shqipërisë, ku deputetët mbështetës të Sali Berishës nuk kanë lejuar zhvillimin normal të punimeve. Në një reagim në Facebook, ambasada britanike kërkon që palët t’I rikthehen dialogut konstruktiv dhe të veprojnë në interes të qytetarëve. “Një parlament që funksionon dhe dialogu konstruktiv mes përfaqësuesve të zgjedhur janë thelbësorë për të garantuar legjislacionin dhe shërbimet në mënyrë efektive. U bëjmë thirrje shumicës dhe opozitës të punojnë së bashku për të garantuar që parlamenti të mund të ushtrojë rolin e tij mbikëqyrës dhe të veprojë në interesin e të gjithë qytetarëve.”, ka theksuar ambasada britanike. Gjatë seancave të fundit, deputetët opozitar kanë ndezur flakadanë duke mos lejuar zhvillimin e punimeve. Po ashtu ata kanë bllokuar edhe punën e komisioneve parlamentare, të cilat po zhvillon online, me argumentin se mazhoranca u ka shkelur të drejtat kushtetuese.