Gjatë vizitës që zhvilloi në Itali kryeministri Edi Rama u prit në një takim në selinë e qeverisë “Palazzo Chigi”, në Romë nga homologia e tij italiane, Giorgia Meloni. Pjesë e takimit ishte dhe kryeministri I Britanisë së Madhe, Rishi Sunak. Pas ceremonisë zyrtare, tre liderat zhvilluan një takim me dyer të mbyllura ku diskutuan për potencialet e bashkëpunimit trilateral. Ndërsa fokusi ishte tek trajtimi I çështjes së emigracionit të paligjshëm si dhe intensifikimi I mëtejshëm I bashkëpunimit midis tre vendeve për të luftuar trafikantët e qenieve njerëzore. Detajet e takimit u bënë të ditura nga kryeministrja italiane në një postim në rrjetet sociale. “Ne ritheksuam gjithashtu rëndësinë e arritjes së një stabilizimi përfundimtar të Ballkanit Perëndimor, edhe në bazë të progresit të bërë së fundmi në procesin e zgjerimit të rajonit në Bashkimin Evropian”, shkroi Meloni. Ndërkohë kryeministri britanik, Rishi Suank u shpreh optimist për diskutimet. Në një postim në platformën X, ish-Twitter, ai theksoi se Britania, Italia dhe Shqipëria do t’ia dalin që të ndalojnë varkat me emigrantë dhe të luftojnë të gjitha rrjetet e trafikut të qenieve njerëzore.