Edi Rama në Athinë foli si kryeministri i një vendi të madh. Në këtë mënyrë, do të hapë një epokë të re në historinë e pritshme të Shqipërisë së Bashkuar, shprehet Spartak Ngjela, në një analizë për vizitën e kryeministrit me diasporën në kryeqytetin grek. Ngjela vlerëson gjuhën e zgjedhur politike, ndërsa flet me superlativa kur thotë se kryeministri tregoi se kërkon të mbetet në histori si Ismail Qemali. Kishte përpara në miting mijëra shqiptarë që e brohoritën në të gjithë analizën e tij historike për ngritjen e sotme të shqiptarisë, e cila ka qenë e luftuar deri në krime nga Greqia, në 120 vite rresht. Rama, thotë analisti, shfaqi në Athinë një fjalim me përmbajtje të thellë të brendshme, përmbajtje kjo e cila sigurisht se do të kapet me tension nervor nga media mediokër e nacionalizmit agresiv të falimentuar të rretheve reaksionare greke. Ngjela është i bindur Rama, do ta shfrytëzojë deri në fund këtë rast historik. Kuptohet se ky fjalim, shton ai, i përpunuar historikisht drejt, do të pritet si risi në kuptimin historik të këtij shekulli, në lidhje me Shqipërinë dhe Kosovën. Kryeministri Edi Rama u prit të dielën nga mijëra qytetarë shqiptarë në Athinë. Nëpërmjet një fjalimi të përgatitur enkas për një event të tillë ai përmendi dy çështjet me delikate mes dy vendeve, atë të çamëve dhe ligjin e luftës. Kryeministri i konsideroi shqiptarët në Greqi si zotër të barabartë të shtëpisë, ndërsa njoftoi edhe disa zhvillime të rëndësishme midis dy vendeve, duke përmendur nisjen e negociatave për marrëveshjen për pensionet e emigrantëve.