Metapneumovirus njerëzor (HMPV) është një sëmundje respiratore që shkakton simptoma të ngjashme me gripin ose të ftohtin, por mund të rrisë rrezikun ose të çojë në komplikime më serioze si bronkiti ose pneumonia, veçanërisht tek të moshuarit, fëmijët e vegjël dhe personat me sistem imunitar të dobët. Kjo sëmundje bën pjesë në të njëjtën familje si “virusi respirator sincitial (RSV)” dhe është zbuluar për herë të parë në vitin 2001 në Holandë. Shpërthimet e saj janë të përqendruara gjatë stinës së ftohtë. Rastet kanë filluar të rriten në Kinën veriore, kryesisht te fëmijët, sipas autoriteteve lokale. Qendra për Kontrollin dhe Parandalimin e Sëmundjeve (CDC) ka paralajmëruar qytetarët të marrin masa për shëndetin dhe higjienën, por ka hedhur poshtë pretendimet online për spitale të mbingarkuara dhe frikën e një pandemie të re si Covid-19. “Infeksionet respiratore kanë prirje të arrijnë kulmin gjatë stinës së dimrit,” tha zëdhënësja e ministrisë së jashtme kineze Mao Ning të premten. “Sëmundjet duket se janë më pak të rënda dhe përhapen në një shkallë më të vogël krahasuar me vitin e kaluar.” Rritja e dukshme e rasteve ka të ngjarë të jetë pjesërisht për shkak të teknologjive të reja që tani mund të zbulojnë dhe identifikojnë më lehtë HMPV, thanë ekspertët për “The Guardian”. Gjithashtu, “mendoj se tani jemi më të kujdesshëm për shpërthimet,” tha Dr. Jacqueline Stephens. “Të gjithë janë shumë vigjilentë, dhe kur dëgjon termin ‘human metapneumovirus’, duket paksa i frikshëm.” HMPV mund të shkaktojë sëmundje më serioze si bronkiti dhe pneumonia te të moshuarit, fëmijët shumë të vegjël dhe personat me imunitet të dobësuar. “Ai sigurisht mund dhe shkakton sëmundje të rënda, prandaj mendoj se është e rëndësishme që njerëzit të jenë të vetëdijshëm që ekziston”, tha Prof. Paul Griffin, drejtor i sëmundjeve infektive në Shërbimet Shëndetësore në Brisbane. “Sfida është se aktualisht nuk mund të bëjmë shumë përveçse të edukojmë njerëzit se është i pranishëm për të reduktuar transmetimin. Nuk ka vaksina ose antivirale, megjithëse disa vaksina janë në zhvillim”, shtoi Griffin. HMPV nuk është si Covid-19, pasi ka qenë i pranishëm për disa dekada dhe ekziston një nivel imuniteti në popullatën globale nga infeksionet e kaluara, thanë ekspertët. Covid-19 ishte një sëmundje e re që nuk kishte prekur kurrë njerëzit më parë, duke shkaktuar përhapjen në nivel pandemie “Nuk mendoj se duhet të shqetësohemi për një pandemi me këtë virus, por rritja e rasteve dhe ndikimi që ka janë të rëndësishme”, tha Griffin. “Një mësim i mirë mund të merret nga pandemia për të reduktuar përhapjen, veçanërisht duke pasur parasysh që nuk kemi vaksina ose antivirale për HMPV.” “Nuk sugjeroj të kthehemi te kufizimet e ashpra të Covid-it, por të qëndrojmë në shtëpi, të praktikojmë etikën e duhur të kollës dhe teshtimës dhe higjienën e duarve janë shumë të rëndësishme gjatë stinës së dimrit.” Ekspertët gjithashtu i bënë thirrje njerëzve që të mos shkojnë në punë kur janë të sëmurë dhe sugjerojnë mbajtjen e maskave në zona të populluara.