Dyshimi i aferave korruptive nxiti bastisjet e policisë belge në disa pjesë të vendit në vazhdën e një hetimi për shkelje të mëdha “nën maskën e lobimit tregtar”, hetim ky që ka shënjestruar edhe individë brenda Parlamentit Europian. Rreth 100 efektivë policie morën pjesë, sipas gazetës vendase Le Soir, në operacionin gjatë të cilit u ndërmorën gjithsej 21 kontrolle anekënd Belgjikës, por edhe në Portugali. Sipas ëebsite-it investigative Follow the Money (FTM), hetimi lidhet me gjigandin kinez të teknologjisë, Huawei dhe aktivitetet e tij në Bruksel që prej vitit 2021. Bastisjet vijnë mbi dy vjet nga skandali "Qatargate", në të cilin një numër ligjvënësish të BE-së u akuzuan se ishin paguar për të promovuar interesat e Katarit dhe Marokut – cka u mohua me forcë asokohe nga të dyja vendet në fjalë. Prokuroria nuk dha detaje për personat apo kompanitë e përfshira. Por ajo nënvizoi se korrupsioni i supozuar nga ana e një "organizate kriminale" ishte praktikuar rregullisht dhe në mënyrë shumë të matur përmes formash të ndryshme nga viti 2021 e deri më sot. Këto forma përfshinin "shpërblimin për marrjen e pozicioneve politike ose dhuratat e tepruara si ushqimi dhe shpenzimet e udhëtimit ose ftesa edhe të rregullta për ndeshje futbolli" si pjesë e një përpjekjeje për të promovuar "interesat tregtare private" në vendimmarrjen politike. Shpërblimet e supozuara u maskuan si shpenzime konferencash dhe ju paguan ndërmjetësuesve të ndryshëm, thanë burime nga prokuroria, të cilët shtuan se janë sekuestruar disa dokumente dhe objekte, me qëllim zbulimin e provave për pastrim parash.