Në samitin e fundit në Paris liderët e BE theksuan angazhimin e vazhdueshëm të vendeve evropiane për të mbështetur Ukrainën. Presidenti francez, Emmanuel Macron, deklaroi se vendet evropiane po punojnë për të “ndërtuar paqen me forcë”, duke ofruar një “ekip franko-britanik” për të “përgatitur ushtrinë ukrainase të së nesërmes”. Një aspekt i rëndësishëm i diskutimeve ishte refuzimi i heqjes së sanksioneve ndaj Moskës, pasi të 30 vendet e përfshira ranë dakord që këto masa ekonomike do të qëndrojnë në fuqi. Megjithatë, një ndasi e rëndësishme u shfaq kur presidenti Macron tha se “nuk ka unanimitet” për dërgimin e paqeruajtësve në Ukrainë, por shtoi se një mision i tillë mund të realizohet edhe pa konsensus të plotë. Kjo ka ngritur dilema mbi aftësinë e vendeve evropiane për të arritur një marrëveshje të qartë mbi rolin e tyre në këtë krizë. Presidenti francez, Emmanuel Macron, theksoi se Rusia “shtiret sikur negocion”, por ai ishte i shqetësuar se Moska nuk po kërkon një marrëveshje paqeje të sinqertë. Kryeministrja italiane, Giorgia Meloni, e cila ishte gjithashtu pjesë e samitit në Paris, u shpreh se është e rëndësishme që të përfshihet edhe SHBA-ja në diskutimet e ardhshme për Ukrainën, në mënyrë që të zgjerohet armëpushimi në infrastrukturën civile si shkollat dhe spitalet. Ajo përsëriti se Italia nuk planifikon të dërgojë trupa ushtarake në terren, por nënvizoi rëndësinë e zbatimit të një armëpushimi të plotë. Gjatë kohës që po zhvillohej samiti u raportua se një aeroplan spiun rus hyri në hapësirën ajrore të NATO-s mbi Baltik. Dy avionë luftarakë gjermanë e shoqëruan dhe monitoruan avionin rus, një incident që tregon përkeqësimin e marrëdhënieve ushtarake midis dy palëve. Pas këtij incidenti reagoi edhe presidenti ukrainas, Volodymyr Zelensky, i cili tha se inteligjenca ukrainase ka zbuluar se Rusia po përgatit sulme të reja në rajone.