Mijëra izraelitë kanë protestuar sërish kundër qeverisë së kryeministrit Benjamin Netanyahu në Tel Aviv dhe bënë thirrje për lirimin e pengjeve të mbajtura në Rripin e Gazës nga Hamasi. "Unë jam sot këtu duke bërtitur jo vetëm për të rrëmbyerit, jo vetëm për babanë tim, por për vendin tim. Vendi që është i plagosur dhe i gjakosur ka nevojë për dritë, ka nevojë për një mrekulli. Ne kemi nevojë për të rikthyer besimin tonë", tha Ella Ben- Ami, vajza e njërit prej pengjeve. Protestat po marrin gjithnjë e më shumë një dimension politik, me shumë persona në mitingje që kërkojnë dorëheqjen e kryeministrit Benjamin Netanyahu dhe shpalljen e zgjedhjeve të reja. Ata e akuzojnë atë se i jep përparësi mbijetesës së tij politike mbi jetën e pengjeve. Bombardimet e Izraelit dhe pushtimi tokësor i Gazës ka vrarë mbi 45,000 palestinezë, më shumë se gjysma e tyre gra dhe fëmijë, sipas Ministrisë së Shëndetësisë së Gazës, e cila nuk bën dallime midis luftëtarëve dhe civilëve në numërimin e saj. Ofensiva ka shkaktuar shkatërrim të gjerë dhe ka zhvendosur rreth 90% të 2.3 milionë banorëve të Gazës larg vendbanimeve të tyre.