President Emmanuel Macron erdhi sot me një makinë të hapur ushtarake në bulevardin Champs-Élysées për paradën tradicionale të 14 korrikut. Parada rinisi zhvillimin e saj pas anulimit në 2020 prej pandemisë së Covid-19. Ne krye te saj ishin rreth 80 trupa franceze dhe evropiane të misionit anti-terrorizëm Takuba në rajonin afrikan Sahel, me të cilat Parisi kërkonte të dërgonte një mesazh diplomatik. Macron ka kërkuar që partnerë të tjerë evropianë të shtojnë përkushtimin e tyre për misionin, teksa muajin e kaluar njoftoi reduktim të trupave franceze atje. Parada e sotme në Paris ishte një version i reduktuar i eventit, me vetëm 10,000 spektatorë në vend të 25,000 që mblidhen normalisht. Fluturimet tradicionale me avionë dhe parakalimet ushtarake, u zhvilluan megjithë parashikimet e dyshimta të motit. Eventi shënon ditën e bastisjes së burgut të Bastille në Paris, me të cilin nisi revolucioni francez i vitit 1789. Pamjet: AFP