Një takim mes ministrit të Jashtëm të Iranit dhe diplomatëve kryesorë europianë të premten ka ngjallur shpresë për më shumë bisedime, por nuk ka dhënë asnjë përparim konkret. Ministrat e Jashtëm të Britanisë së Madhe, Francës dhe Gjermanisë, si dhe shefja e politikës së jashtme të Bashkimit Evropian, kanë mbajtur bisedime në Gjenevë të Zvicrës me ministrin iranian, Abbas Araghchi, të premten. Ishte hera e parë që zyrtarët perëndimorë dhe iranianë u takuan përballë njëri-tjetrit që nga nisja e konfliktit. Përtej deklaratave formale, Europa i ka kërkuar Iranit të ndalojë menjëherë procesin për pasurimin e armëve bërthamore. Teherani ka kërkuar se kjo do të ndodhë kur Izraeli të ndalë sulmet. Dhe sipas ekspertëve, pikërisht ky është ngërçi. “Rezultati i mirë sot është se largohemi me përshtypjen se pala iraniane është thellësisht e gatshme për të biseduar për të gjitha çështjet e rëndësishme”, ka thënë ministri i Jashtëm i Gjermanisë, Johann Wadephul. Ai ka thënë se të dyja palët kanë pasur “bisedime shumë serioze”. Ndërkohë, sekretari i Jashtëm britanik, David Lammy, ka thënë se janë të vendosur të vazhdojnë diskutimet e negociatat me Iranin. “Dhe i bëjmë thirrje Iranit të vazhdojë bisedimet me Shtetet e Bashkuara të Amerikës. Ne ishim të qartë: Irani nuk mund të ketë armë bërthamore”, ka shtuar ai. Shefja e Politikës së Jashtme të BE-së, Kaja Kallas, ka thënë se janë dakordësuar “që të diskutojmë çështjet bërthamore, por edhe më të gjera, dhe që diskutimet të mbeten të hapura”. Edhe ministri iranian u është adresuar gazetarëve pas bisedimeve në hotel. Ai ka shprehur mbështetje për vazhdim të diskutimeve dhe ka shprehur gatishmërinë “për takime të tjera në të ardhmen e afërt”. Më pas ka dënuar sulmet e Izraelit mbi zonat bërthamore në Iran dhe ka shprehur “shqetësim të thellë” në atë që e ka quajtur “mosdënim” nga shtetet evropiane.