Demonstruesit që protestojnë kundër politikës së vaksinimit të detyruar në Itali u përplasën sot me forcat e shumta të policisë në portin verior të Trieste. Ky i fundit është vënë në krye të lëvizjes kundër politikës së Green-Pass që ka përfshirë dhe porte e sektore të tjera të ekonomisë së Italisë. Raportimet nga Trieste janë kontradiktore teksa punonjësit grevistë thonë se nuk do të heqin dorë nga greva, ndërsa kreu rajonal Massimiliano Fedriga tha se “porti funksionon”. Vonesa e bllokime raportohen dhe nga porti i Genoa në veriperëndim, ku disa qindra punonjës kanë bllokuar disa prej hyrjeve. 10,000 punonjës janë në grevë në portin madhor të Trieste, që është një qendër detare e veriut të Italisë dhe e lidhjeve me Gjermaninë, Austrinë dhe Evropën Qendrore.