Programi i shplarjes së trurit i Putinit është zhytur në thellësi të reja me një karikaturë propagandistike distopike që synon fëmijët e vegjël. Shfaqja e animuar për fëmijë përdor versione të udhëheqësve botërorë si fëmijë, për të mbjellë ndjenja pro-Putinit dhe anti-perëndimore që përpara se fëmijët të mund të ecin ose të flasin. Propagandisti kryesor i Putinit, Vladimir Solovyov, udhëhoqi shfaqjen e re të quajtur Sandpit. Producentët thonë se qëllimi i saj është që të "ngulisë patriotizmin që në moshë të vogël" dhe t'u mësojë foshnjave ruse të "diskutojnë gjeopolitikën". Një trailer 30-sekondësh i postuar në llogarinë e Solovyov në Telegram, tregon versione të vogla të Putinit, Trump, Macron, Musk, Erdogan dhe Kim Jong-un duke biseduar në një video-telefonatë. Në një moment, Kim i thotë Macronit se nuk duhet të lejohet të kalojë kohë me të tjerët sepse "është gjithmonë me gjyshen e tij", një tallje kjo për gruan e presidentit francez, Brigitte, e cila është 24 vjet më e madhe se ai. Kur Trump pyet pse biseda e tyre po zhvillohet në një aplikacion rus për video, Putin përgjigjet me një goditje ndaj teknologjisë perëndimore: "Sepse Skype-i yt është ndërprerë, ja pse." Putin, fytyra e të cilit duket e sjellshme dhe e qetë, shfaqet i veshur me një uniformë të bardhë xhudoje. Pranë presidentit rus qëndron një arush pelushi, një simbol i identitetit kombëtar, dhe një anije lodër që përfaqëson Flotën e Detit të Zi të Marinës Ruse. Ndërkohë, Kim, i cili aktualisht po dërgon trupa dhe armë për të mbështetur luftën e Putinit në Ukrainë, duket si i fiksuar pas raketave, dhe mban fort në duar një raketë lodër. Erdogan, në anën tjetër është portretizuar në një stil të ekzagjeruar. I veshur me fezin tradicional, presidenti turk shfaqet në një sfond të zbukuruar, të frymëzuar nga osmanët. Ndërsa Erdogan dhe Macron shfaqin shpërthime ankthi, Trump dhe Musk buzëqeshin me vetëkënaqësi. Biznesmeni i shndërruar në president shihet në një dhomë të shndritshme, ndërsa CEO i Tesla-s duket i fiksuar pas makinës së tij lodër. Kremlini në fakt ka kohë që ka vënë në shënjestër fëmijët me propagandë shtetërore. Në paradat e Ditës së Fitores në Rusi, karrocat e fëmijëve shndërrohen në tanke kartoni dhe foshnjat vishen me uniforma të vogla ushtarake. Nëpër shkolla fëmijët, që në moshën parashkollore ekspozohen ndaj botës së armëve dhe kulturës ushtarake.