Aleatët e Ukrainës do të kërkojnë gjatë samitit të G20 në Afrikën e Jugut, “forcimin e planit amerikan që synon fundin e luftës së saj me Rusinë , e pohuar kjo nga kryeministri britanik Sir Keir Starmer. Samiti nis një ditë pasi presidenti Volodymyr Zelensky paralajmëroi se Ukraina po përballet me “një nga momentet më të vështira në historinë e saj”, për shkak të presionit për të pranuar planin – detajet e rrjedhura të të cilit shihen si të favorshme për Moskën. Duhet të zgjedhim mes humbjes së dinjitetit dhe humbjes së një aleati të fuqishëm, ishte komenti i tij. Zelensky zhvilloi telefonata me Sir Keir dhe udhëheqësit e Francës dhe Gjermanisë të premten. Pas bisedimeve, kryeministri britanik tha se “miqtë dhe partnerët” e Ukrainës mbeten të përkushtuar për të siguruar “një paqe të qëndrueshme njëherë e përgjithmonë”. Në samitin e G20-tës, nuk po marrin pjesë as presidenti amerikan Donald Trump e as presidenti rus Vladimir Putin. Plani amerikan i paqes, përfshin propozime që Kievi i kishte përjashtuar më herët, përfshirë dorëzimin e disa zonave lindore të cilat aktualisht ai vetë i kontrollon. Uashingtoni ka ushtruar presion që Kievi ta pranojë planin dhe këtë javë ka dërguar zyrtarë të lartë të Pentagonit në Ukrainë për ta diskutuar atë. Por në Europë ka shqetësime lidhur me atë që shihet si një paketë termash që anon ndjeshëm nga Moska. Shefja e politikës së jashtme të BE-së, Kaja Kallas, e quajti mundësinë e pranimit të planit si një “moment tejet të rrezikshëm”.