Përfundon pas 3 orësh protesta e opozitës, rikthehet në normalitete qarkullimi i automjeteve. Protestuesit janë larguar dhe ka nisur lëvizja e mjeteve në 5 pikat kyçe. Demokratët ashtu si në protestën e 29 tetorit vijuan me të njëjtën strategji të mosbindjes civile, me bllokim rrugësh, bllokim aksesh apo nyjesh kryesore të qarkullimit në kryeqytet. Deputetët ishin të ndarë në disa grupe në pikat kyçe të Tiranës, si Bashkia, Rrethrrotullimi i “Zogut të Zi”, “Rruga e Elbasanit”, “Sheshi Willson” dhe “Pallati me Shigjeta”. Shumë prej qytetarëve që kanë qenë duke lëvizur me mjetet e tyre kanë ngelur të bllokuar prej tri orësh. Protesta e opozitës nisi me tensione që në minutat e para, pasi policia kundërshtonte bllokimin e akseve në kryeqytet. Deputetët e opozitës nga ana tjetër kundërshtuan efektivët dhe u përplasën fizikisht me ta. Deri më tani ka disa të shoqëruar nga policia, ndërsa një person është lënduar nga uji me presion.