Një 34 vjeçare, nënë e dy fëmijëve ka gjetur vdekjen pasi kreu një abort në Spitalin e Elbasanit. Etleva Çullhaj paraditen e së hënës është paraqitur në Maternitetin e Elbasanit për të kryer një abort dhe më pas është larguar për në banesën e saj. Pas komplikimeve të gjendjes shëndetësore 34 vjecarja ka kërkuar ndihmën e ambulancës të cilat e kanë transportuar sërish në spital, por me gjithë ndihmën mjekësore Etleva Çullhaj ka humbur jetën. Prokuroria e Elbasanit është njoftuar nga spitali për ngjarjen dhe ka nisur hetimet ndaj dy mjekëve, mjekut gjinekolog dhe atij anestezist me akuzën e “neglizhencës në dhënien ne ndihmës mjekësore”. 34 vjeçarja nga fshati Baldushk i Tiranës, jetonte me qira me dy fëmijët në Elbasan. Ajo nuk kishte familjarë në Elbasan pasi bashkëshorti vuan dënimin në Greqi për vrasje. Burime nga spitali i Elbasanit bëjnë me dije për Top Channel se 34 vjeçarja kishte abortuar edhe herë tjetër ndërsa shtazënia aktuale ishte rreth 12 javë, një periudhë jo e përshtatshme dhe e rrezikshme për kryerjen e abortit. Por burimet thonë gjithashtu se fetusi nuk kishte shenja jete ndaj dhe kryerja e ndërhyrjen ishte e nevojshme. Ekspertiza mjeko ligjore pritet të hedhë dritë mbi shkaqet e ngjarjes së rëndë.