Takimi i Parisit solli një dakordësi që me shumë gjasë, do të jetë muzikë për veshët e presidentit Volodimir Zelensky: Shtetet perëndimore që mbështesin Ukrainën u pajtuan me një kuadër të gjerë garancish sigurie ushtarake për vendin e përballur me agresionin rus. Në samitin e kryesuar nga Presidenti francez Emmanuel Macron dhe kryeministri britanik Keir Starmer morën pjesë 35 krerë shtetesh dhe qeverish, disa personalisht dhe disa përmes lidhjeve-video. Sipas Zelenskyt gjithashtu pjesëmarrës, "Koalicionit të të Gatshmëve" janë të një mendjeje mbi kornizën e përgjithshëm të garancive të sigurisë. Rëndësi qendrore ka sipas tij një ushtri e fortë ukrainase. Pas takimit të grupit në Paris ai tha se të gjithë ranë dakord që Rusia refuzon çdo iniciativë paqeje. Sipas Macronit 26 vende janë gati të dërgojnë trupa për të siguruar armëpushimin ose paqen në Ukrainë, e disa shtete të tjera po shqyrtojnë nëse do të bëhen ose jo pjesë e nismës. Këto vende janë zotuar zyrtarisht për të stacionuar trupa në Ukrainë ose për të mbështetur Ukrainën dhe për të siguruar paqen përmes pranisë nga toka, deti ose ajri. Kjo trupë ushtarake nuk ka as vullnetin dhe as objektivin për të zhvilluar luftë kundër Rusisë, përkundrazi ka për qëllim të sigurojë paqen dhe të dërgojë një sinjal të qartë strategjik. Franca dhe Britania e Madhe kishin rënë dakord që para takimit që të dërgonin disa mijëra trupa në Ukrainë. Danimarka, Estonia dhe Lituania gjithashtu u zotuan të bëjnë të njëjtën gjë. Suedia shprehu gatishmërinë e saj për të siguruar një paqe të mundshme në Ukrainë përmes mbikëqyrjes ajrore dhe nga deti. Holanda deklaroi se mund të ofronte ndihmë nga ajri, deti dhe toka. Gjermania sakaq e bëri të qartë se nuk planifikon të dërgojë ushtarë. Për Berlinin, prioritet kryesor është pajisja e forcave të armatosura ukrainase në mënyrë që vendi të mund të vetëmbrohet, dhe për cdo gjë tjetër, qeveria gjermane do të vendosë për gjithçka tjetër vetëm pas një armëpushimi.