Gjykata e Durrësit la të lirë, këtë të shtunë, 34-vjeçarin nga Tirana, i cili u arrestua, dy ditë më parë, me 88,000 euro të padeklaruara në kufi dhe një sasi shishesh me verë të dyshuara si kontrabandë. Elton Balliu u arrestua në portin e Durrësit, pas kontrollit që u ushtrua në kamionin e drejtuar prej tij, pasi mbërriti me një nga tragetet e linjës së Barit. Bazuar në gjendjen shëndetësore dhe familjare të Balliut, prokurorja e çështjes kërkoi gjatë seancës që u zhvillua me dyer të mbyllura, masën e sigurisë "detyrim paraqitjeje" për 34-vjeçarin, masë që u pranua nga gjyqtari Alban Veçani. Policia deklaroi se 88 mijë eurot e ndara në katër pako të mbështjella me natriban, u gjetën të fshehura në një çantë dhe xhup, por shoferi i kamionit ka deklaruar se pakot ishin porosi dhe ai nuk e dinte përmbajtjen e tyre.