Pas 13 vitesh virusi i Nilit u rikthye në vendin tonë, ndërsa një prej vatrave të evidentuara është në Savër të Lushnjes ku, Instituti i Shëndetit Publik ka konfirmuar një 63-vjeçar të infektuar. Top Channel kontaktoi me Skënder Delilaj, i cili e ka zbuluar infektimin pasi ka shkuar në Greqi. Atje i është nënshtruar një mjekimi të specializuar, pasi prej ditësh nuk i ulej temperatura. Diagnostikimi i 63-vjecarit me ethet e nilit nuk ka qënë i lehtë as për mjekët greke. Fillimisht 63-vjecari shqiptar u dyshua se ishte i sëmurë nga konsumimi i bulmetit, por pas një analizë të bërë nga palca e pacientit u konfirmua që ishte i infektuar nga pickimi i mushkonjes dhe infektimi kishte ndodhur në periudhën që 63 vjeçari ishte në Shqipëri. Autoritetet në Greqi njoftuan në pas ministrinë e Shëndetësisë në Shqipëri. Banorët në Savër thonë se autoritetet kanë spërkatur zonën dhe se vetë ata po mundohen të marrin masat e nevojshme që të shmangin pickimet nga mushkonjat. Më të moshuarit dhe ata që vuajnë nga sëmundje të tjera nuk e fshehin frikën. Ata kërkojnë që përvec ndërhyrjes nga autoritetet shëndetësore me spërkatje të vazhdueshme të nisë edhe një fushatë sensibilizimi për vetë banorët.