Prokuroria e Posaçme Antikorrupsion ka dalë sot me një njoftim zyrtar ku sqaron me detaje operacionin e organizuar një ditë më parë, ku në bashkëpunim me Europol lëshuan 21 masa arresti. Njoftimi i SPAK: SPAK godet Organizatën Kriminale nga Elbasani në Trafikun Ndërkombëtar të Kokainës Prokuroria e Posaçme Kundër Korrupsionit dhe Krimit të Organizuar (SPAK), në bashkëpunim me Eurojust, Europol, autoritetet e drejtësisë së Francës, Belgjikës, Holandës dhe Ekuadorit ka dokumentuar dhe ndjekur penalisht një organizatë të mirëstrukturuar kriminale në trafikun ndërkombëtar të kokainës, me bazë në qytetin e Elbasanit dhe me shtrirje në vendet e Bashkimit Europian dhe Amerikës Latine. Ky hetim i bazuar në komunikimet e koduara SKY/ECC dhe në veprimet të tjera hetimore vijon edhe për dokumentimin e veprimtarisë kriminale për persona të tjerë. Me kërkesë të Prokurorisë së Posaçme, Gjykata e Posaçme e Shkalles së Parë për Korrupsionin dhe Krimin e Organizuar ka caktuar masat e sigurisë për 21 persona: Arrest me burg për 18 individë, duke përfshirë drejtuesit e grupit, një ish-zyrtar i lartë policie dhe një ish-gjyqtar. Arrest në shtëpi për 1 avokat. Detyrim paraqitjeje për 2 gazetarë.