Nje studim i fundit i OKB-së tregon se puna me orar të zgjatur, më shumë se 55 orë në javë, shton ndjeshëm rrezikun e vdekjes nga sëmundjet e zemrën e nga hemoragjia cerebrale. Raporti i Organizatës Botërore të Shëndetësisë (OBSH) dhe asaj Ndërkombëtare të Punës (ILO) u publikua në kohën kur pandemia e COVID-19 ka ndryshuar mënyrën e të punuarit dhe shtuan mundësinë e orëve të gjatë në punë, edhe pse hulumtimi vetë nuk i referohet kësaj periudhe por viteve të mëparshme. Autorët e tij analizuan të dhënat e mbledhura nga dhjetëra studimet të tjera ku përfshiheshin qindra mijëra pjesëmarrës. "Puna 55 orë ose më shumë në javë është një rrezik serioz për shëndetin", pohoi Maria Neira, drejtoreshë e departamentit të mjedisit, ndryshimit të klimës dhe shëndetësisë të OBSH-së. "Është koha që qeveritë, punëdhënësit dhe punonjësit të ndërgjegjësohen se orët e gjata të punës mund të çojnë në vdekje të parakohshme", nenvizoi ajo. Studimi arriti në përfundimin se puna 55 orë ose më shumë në javë shoqërohej me një rritje prej 35 për qind të rrezikut nga pësimi i një goditjeje në tru dhe një rritje prej 17 për qind të rrezikut të vdekjes nga sëmundjet e zemrës, krahasuar me punën nga 35 në 40 orë. Sipas OBSH-së dhe ILO-së në vitin 2016, gati 400 mijë vetë vdiqën nga hemoragjia cerebrale dhe 347.000 nga sëmundjet e zemrës, pasi punuan të paktën 55 orë në javë.