Vetëm pak minuta pasi presidenti amerikan Donald Trump kishte nisur fjalimin e tij drejtuar kombit, ligjvënësi nga Teksasi, Al Green, u shoqërua jashtë sallës nga rojet e sigurisë. Arsyeja ishte pankarta që ai mbante në duar, ku shkruhej: “Njerëzit me ngjyrë nuk janë majmunë”, një referim ky ndaj videos ofenduese të publikuar ditë më parë nga Trumpi në Truth Social mbi Barack dhe Michelle Obama. Ndërsa shoqërohej jashtë, Green e ktheu edhe një herë pankartën ndaj republikanëve. “Martin Luther King shkoi në burg sepse mbajti një qëndrim. Rosa Parks shkoi në burg sepse mbajti një qëndrim. Ndonjëherë duhet të mbash një qëndrim”, u shpreh më pas Green, duke komentuar largimin e tij. Gjatë pjesës së parë të fjalimit, demokratët kishin qëndruar në heshtje dhe të përmbajtur. Por kur Trump sulmoi emigrantët, qetësia në sallë u prish. Deputetet Ilhan Omar dhe Rashida Tlaib bërtitën disa herë kundër presidentit, duke kundërshtuar përkufizimin e tij për komunitetin somalez të Minesotës si “piratë” dhe duke e akuzuar se me politikën e tij të ashpër ndaj emigracionit kishte nxitur vdekjen e qytetarëve amerikanë. Në vijim, pasoi një shkëmbim i ashpër komentesh me presidentin, i cili u përgjigj: “Duhet t`ju vijë turp”.