Ministria e jashtme në Moskë konfirmoi fundosjen e një anije ruse mallrash në Detin Mesdhe. Anija e quajtur Ursa Major u mbyt diku mes Spanjës e Algjerisë pas një shpërthimi të fuqishëm në dhomën e motorit. Të paktën dy anëtarë të ekuipazhit rezultojnë të zhdukur. Ursa Major ishte nisur 12 ditë më parë nga porti i Shën Petërburgut. E ndërtuar në vitin 2009, ajo ishte nën kontrollin e Oboronlogistika, një kompani e cila ka qenë pjesë e operacioneve të ndërtimit ushtarak të Ministrisë Ruse të Mbrojtjes, dhe që kishte njoftuar më parë se anija ishte rrugës për në portin e Vladivostokut në Lindjen e Largët Ruse. Qendra e krizave e Ministrisë së Jashtme deklaroi se 14 nga 16 anëtarët e ekuipazhit ishin shpëtuar dhe dërguar në Spanjë; për dy të tjerët nuk dihet ende asgjë. Asnjë informacion nuk është dhënë mbi shkakun e shpërthimit në dhomën e motorit. Ambasada e Rusisë në Spanjë, e cituar nga agjencia shtetërore ruse RIA, njoftoi se po heton rrethanat e mbytjes dhe ishte në kontakt me autoritetet spanjolle. Anija Ursa Major, u vunë nën sanksione nga Shtetet e Bashkuara në vitin 2022 për lidhjet me ushtrinë ruse. Shërbimi Spanjoll i Shpëtimit Detar tha se kishte marrë një sinjal emergjence prej saj kur anija ndodhej rreth 57 milje larg bregut të Almerias. Sipas ekuipazhit, ajo transportonte kontejnerë bosh, si dhe dy vinça portualë në kuvertë. Më vonë, një anije luftarake ruse mbërriti në vendngjarje dhe mori përgjegjësinë për operacionet e shpëtimit.