Kryeministri Edi Rama kërkon mandatin e katërt si kryeministër i Shqipërisë me premtimin ambicjoz të anëtarësimit në BE: Theksi i prestigjozes britanike The Guardian në lajmin e saj kushtuar zgjedhjeve të sotme parlamentare në vendin tonë, që kanë tërhequr vëmendjen e mjaft mediave të mëdha botërore, ishte pikërisht tek rruga e shumëpremtuar dhe e shumëdëshiruar drejt bllokut europian, të cilën kreu i PS-së e ktheu në lajtmotiv të fushatës së tij. Partia Socialiste e zotit Rama, vazhdon gazeta e njohur, thotë se mund të sigurojë anëtarësimin në BE në pesë vjet, duke iu përmbajtur një zotimi të hershëm ndërkohë që lufton kundërshtarët konservatorë me akuza publike dhe premtime konkurruese për rritjen e pagave. Një fushatë më e larmishme kjo për The Guardian falë shfaqjes së partive të reja, e zhvillimit të një pjesë të saj në mediat sociale në sfondin e një ndalimi të TikTok-ut.