Sekretari i Shtetit i SHBA-së, Marco Rubio, u zotua se SHBA nuk do të detyrojë Ukrainën të nënshkruajë asnjë marrëveshje për t'i dhënë fund pushtimit rus. "Nuk ka marrëveshje paqeje nëse Ukraina nuk e pranon atë", tha Rubio në një konferencë për shtyp në Uashington. Ndërsa Presidenti ukrainas Volodymyr Zelensky thotë se Shtetet e Bashkuara kanë propozuar një takim trepalësh në Miami me Ukrainën dhe Rusinë. “Ata propozuan këtë format, për aq sa kuptoj unë: Ukraina, Amerika, Rusia. Edhe evropianët mund të jenë të pranishëm. Do të ishte "logjike të mbahej një takim i tillë i përbashkët, pasi të kuptohen rezultatet e mundshme të takimit që është zhvilluar tashmë", theksoi ai. Ndërkohë, Presidenti rus Vladimir Putin ka thënë se nuk do të ketë më luftëra pas Ukrainës, nëse Rusia trajtohet me respekt dhe i ka hedhur poshtë pretendimet se Moska po planifikon të sulmojë vendet evropiane si “marrëzi”. Putin shtoi gjithashtu kushtin që nuk do të ketë pushtime të mëtejshme ruse “nëse nuk na mashtroni siç na mashtruat me zgjerimin e NATO-s drejt lindjes”. I dërguari i Donald Trump, Steve Ëitkoff, dhe dhëndri i presidentit, Jared Kushner, pritet të jenë në Miami nga pala amerikane. Sekretari i Shtetit i SHBA-së Marco Rubio gjithashtu pritet të marrë pjesë. Negociatori i Kremlinit, Kirill Dmitriev, do të jetë nga pala ruse. I dërguari i Zelensky, Rustem Umerov, ka qenë tashmë në SHBA që nga dje për t'u takuar me negociatorët amerikanë.