Ndonëse prej muajit mars 2026, Belinda Balluku nuk është “de juro” ministre e Infrastrukturës dhe Energjetikës, ajo vazhdon “de facto” të drejtojë këtë dikaster dhe institucionet në varësi. Emisioni “Fiks Fare”, në Top Channel, nisi sezonin me një investigim në disa prej drejtorive kryesore në varësi të Ministrisë së Infrastrukturës dhe Energjetikës, ku drejtuesit vazhdojnë të quajnë “shefe” vetë Ballukun. Investimi i “Fiks Fare” zbulon se Belinda Balluku vijon të ndikojë në këto institucione për emërime, punësime dhe vendimmarrje. Belinda Balluku nuk është vetëm “shefja” e drejtorive! Disa drejtues institucionesh mendojnë se ministri i ri i Infrastrukturës dhe Energjetikës, Enea Karakaçi, është vendosur po prej saj. “Fiksi” vijoi investigimin brenda vetë Ministrisë së Infrastrukturës dhe Energjetikës, ku bisedoi me ish-këshilltarin e Ballukut, Flor Serjanin, që mban detyrë në ministri, por njëkohësisht vijon të punojë edhe për ish-ministren. Pas gjithë këtyre dëshmive, “Fiks Fare” shkon te personi që përmendet vazhdimisht në këto biseda: Belinda Balluku. Gazetarja e takon teksa ajo ecën në zonën e Liqenit të Tiranës dhe kërkon prej saj një sqarim, por ish-numri dy i qeverisë refuzon të përgjigjet.