Ambasada e Bashkimit Europian në Tiranë ka bërë një njoftim të rëndësishëm për të gjithë qytetarët që udhëtojnë nga vendet jashtë BE-së drejt Zonës Shengen, përfshirë edhe shqiptarët. Duke filluar nga data 12 tetor 2025, do të hyjë në fuqi Sistemi i ri i Hyrje/Daljes, i cili do të ndryshojë mënyrën se si regjistrohen hyrjet dhe daljet në 29 vendet e Zonës Shengen. Po çfarë është sistemi EES? Sistemi i Hyrje/Daljes është një sistem elektronik i menaxhimit të kufijve, i cili do të regjistrojë në mënyrë automatike të dhënat e udhëtarëve që nuk janë shtetas të BE-së dhe që udhëtojnë për qëndrime të shkurtra në zonën Shengen. Qëllimi i këtij sistemi është të përmirësojë kontrollin kufitar dhe të rrisë sigurinë. Sipas njoftimit të ambasadës, sistemi do të regjistrojë: • Të dhënat nga dokumenti i udhëtimit • Datat e mbërritjes dhe të largimit • Të dhënat biometrike, përfshirë: • Shenjat e gishtave • Imazhin e fytyrës Ambasada thekson se nuk ka asnjë veprim që udhëtarët duhet të kryejnë para udhëtimit. Gjithashtu, aplikimi i sistemit nuk shoqërohet me asnjë tarifë shtesë. Sistemi i ri zbatohet për qytetarët e vendeve jashtë BE-së, përfshirë Shqipërinë dhe për ata që udhëtojnë për qëndrime të shkurtra në zonën Shengen. Ky sistem është pjesë e përpjekjeve të Bashkimit Europian për të dixhitalizuar dhe forcuar kontrollet kufitare, si dhe për të parandaluar qëndrimet e paligjshme apo hyrjet e paautorizuara.