19 efektivë të policisë mes tyre drejtues të lartë janë proceduar penalisht dhe janë pezulluar nga detyra pas zbulimit të një skeme abuzive me fondet e Frontex. Sipas të dhënave punonjësit e policisë kanë përfituar shuma të ndryshme financiare gjatë kohës që ushtronin detyrën e tyre në misionin FRONTEX. Skema e abuzimit lidhet me përfitimin e dietave të shërbimit në mënyrë fiktive ku efektivët në bashkëpunim edhe me përfaqësuesit e 2 hoteleve kanë arritur të përfitojnë shuma që variojnë nga 1000 deri në 2000 euro. Punonjësit e nivelit drejtues sipas Agjencisë së Mbikëqyrjes Policore nxirrnin urdhërua transferimi fiktivë për punonjësit në stacione të ndryshme të Policisë kufitare të Korçës të cilët më pas paraqisnin dokumentet fiktivë për të përfituar dietat e shërbimit. Hetimi njëvjeçar bëri të mundur që të dokumentohet abuzimi që 19 efektivët e policisë, si dhe dy qytetarë, kanë arritur të vjedhin fondet nga FRONTEX vlera totale e të cilave arrin 400 mijë euro. Nga hetimet ka rezultuar se një dietë ditore e FRONTEX është 50 euro, ndërkohë që për një efektiv apo drejtues janë lëshuar edhe shërbime fiktive me dokumente të falsifikuara edhe për 20 ditë rresht apo edhe më shumë. Burime nga grupi hetimor thanë se për këtë rast janë proceduar gjithsej 40 persona, ku përveç atyre që janë pezulluar nga detyra pjesa tjetër po hetohet ne gjendje te lire.