Ish-kryetarja e Dhomës së Përfaqësuesve në Shtetet e Bashkuara të Amerikës, Nancy Pelosi është shtruar në spital pasi u aksidentua gjatë një angazhimi zyrtar në Luksemburg. 84-vjeçarja, gjendej në Evropë për të shënuar 80-vjetorin e Betejës në Ardene, mes Belgjikës dhe Luksemburgut, në Luftën e Dytë Botërore. Zëdhënësi i saj, tha përmes një deklarate se “Pelosi po merr trajtim të shkëlqyer nga mjekët dhe profesionistët e mjekësisë dhe nuk është në gjendje të jetë e pranishme në pjesën e mbetur të ceremonive dhe takimeve të parashikuara në kuadër të vizitës së saj”. Ai nuk dha ndonjë hollësi shtesë mbi dëmtimin që kishte pësuar Pelosi. Nancy Pelosi, e cila u zgjodh për herë të parë në 1987 dhe shërbeu dy herë si kryetare e Dhomës së Përfaqësuesve, dha dorëheqjen nga posti dy vjet më parë, por qëndroi në Kongres dhe në nëntor u rizgjodh për të përfaqësuar qarkun e saj të San Franciskos. Ajo ka qenë aktive përgjatë dy viteve të fundit, që kur la postin e lartë, duke punuar me demokratët larg syve të opinionit, si dhe publikisht, dhe duke marrë pjesë në ngjarje zyrtare. Njoftimi për dëmtim të Pelosi tvjen disa ditë pasi udhëheqësi i republikanëve në Senat, u pengua dhe u rrëzua në Senat. Ai ndrydhi kyçin e dorës dhe pësoi një çarje në fytyrë.