Ukraina dhe Rusia kanë këmbyer 90 të burgosur të luftës, në këmbimin më të madh mes dy shteteve në pothuajse pesë muaj. Marrëveshja për këmbimin e të burgosurve u realizua me ndërmjetësimin e Emirateve të Bashkuara Arabe. “Sot, 90 qytetarë tjerë tanë janë kthyer në shtëpitë e tyre nga robërimi rus”, tha presidenti ukrainas, Volodymyr Zelensky, përmes një postimi në rrjetet sociale. “Ne nuk i harrojmë të gjithë njerëzit tanë që janë nën robërimin rus. Ne vazhdojmë të punojmë për lirimin e secilit prej tyre”, shtoi ai. Rusia tha se 90 ushtarët e saj “që ishin në rrezik për jetë gjatë mbajtjes në robëri, janë kthyer nga territori që kontrollohet nga regjimi i Kievit”. Të burgosurit e liruar rusë më pas do të dërgohen në Moskë “për trajtim dhe rehabilitim”, tha Ministria ruse e Mbrojtjes, duke konfirmuar se Rusia ka liruar në këmbim 90 ushtarë ukrainas. Në këmbimin e fundit, që ndodhi në fund të majit, Moska dhe Kievi këmbyen 75 të burgosur. Edhe ai këmbim u realizua me ndërmjetësimin e Emirateve të Bashkuara Arabe. Ndërkaq, në shkurt të dyja palët thanë se kanë këmbyer 100 të burgosur, në këmbimin e parë të të burgosurve që kur Moska akuzoi Kievin për rrëzimin e një avioni që bartte ushtarë ukrainas të zënë rob. Pamjet; AFP